Samtryggingardeild SL Lífeyrissjóður
SL líferissjóður státar af einni bestu langtímaávöxtun íslenskra lífeyrissjóða. Sjóðurinn er ábyrgur fjárfestir og hefur aldrei þurft að skerða lífeyrisgreiðslur sinna rétthafa. Gæði og öryggi eru í fyrirrúmi hjá sjóðnum og er hann eini lífeyrissjóður landsins sem er vottaður samkvæmt alþjóðlegum gæða-, upplýsingaöryggis- og umhverfisstöðlum.
Aðild
Aðild að sjóðnum er öllum opin.
Ellilífeyrir
Mánaðarlegur ellilífeyrir er greiddur frá 67 ára aldri til æviloka en sjóðsfélagi getur flýtt lífeyristöku til 60 ára eða seinkað til allt að 80 ára.
Örorkulífeyrir
Sjóðfélagi sem ekki hefur náð 67 ára aldri á rétt á örorkulífeyri verði hann fyrir orkutapi vegna sjúkdóms eða slyss, hafi hann greitt iðgjöld í lífeyrissjóð í a.m.k. 24 mánuði. Örorkulífeyrir er greiddur í samræmi við áunnin réttindi fyrir orkutap. Skilyrði fyrir greiðslu örorkulífeyris eru að orkutapið sé meira en 50% að mati trúnaðarlæknis, að það vari í sex mánuði eða lengur og valdi tekjuskerðingu.
Til þess að eiga kröfu til framreiknaðra réttinda þarf sjóðfélagi að hafa greitt ákveðið lágmarksiðgjald til sjóðsins í a.m.k. þrjú af síðustu fjórum árum og þar af sex af síðustu tólf mánuðum. Ýmis önnur skilyrði eru fyrir rétti til framreiknings, sbr. samþykktir sjóðsins.
Makalífeyrir
Makalífeyrisréttindi eru hverju sinni 50% af elli- eða örorkulífeyrisréttindum sjóðfélagans, hvort sem gefur hærri rétt við fráfall.
Makalífeyrir er greiddur ævilangt út á réttindi sem eru tilkomin fyrir 1. janúar 2006. Réttindi sem eru tilkomin eftir 1. janúar 2006 eru greidd út að lágmarki í 48 mánuði ásamt 50% í 36 mánuði.
Auk áunninna réttinda kann maki að eiga rétt á framreikningi. Framreikningsreglur eru þær sömu og í örorkulífeyri. Ef réttur er til framreiknings myndast einnig réttur til barnalífeyris.
Makalífeyrir fellur niður ef makinn gengur í hjónaband á ný eða stofnar til sambúðar eða staðfestrar samvistar.
Barnalífeyrir
Barnalífeyrir greiðist við andlát foreldris/forráðamanns vegna barna, stjúpbarna og fósturbarna til 22 ára aldurs. Réttur til barnalífeyris er einnig til staðar hafi foreldri/forráðamaður orðið fyrir orkutapi og sé á örorkulífeyri.
Fullur barnalífeyrir vegna fráfalls foreldris/forráðamanns er kr. 26.187 á mánuði og fullur barnalífeyrir vegna örorku er kr. 19.204 á mánuði. Báðar upphæðirnar taka breytingu um hver mánaðamót í hlutfalli við breytingu á vísitölu neysluverðs.
Lánaréttindi
Lánaréttindi hefur sá sjóðfélagi sem greitt hefur iðgjöld til sjóðsins fyrir sex af síðustu tólf mánuðum eða hefur 36 mánaða iðgjaldasögu hjá sjóðnum.
